Aboubakar Kamara u arrestua gjatë stërvitjes së klubit anglez të Fulhamit sepse ishte përballur fizikisht me një anëtar të stafit teknik të klubit.
Kamara dyshohet se kishte sulmuar fizikisht një ndihmës të trajnerit, Claudio Ranieri, i cili ishte larguar kohët e fundit nga ekipi.
Këtë e ka konfirmuar edhe policia angleze përmes një komunikate për media teksa ka treguar se ngjarja kishte ndodhur të hënën.
“Policia u thirr të hënën diçka pas orës 17:00 pas informacioneve rreth një rrahje në kompleksin e stërvitjeve. Në atë rast, oficerët e policisë morën një burrë për vepër penale. Ai është në paraburgim në stacionin e policisë në Londër. Hetimet po vazhdojnë”, tha një zëdhënës i policisë.
Nuk duhej shumë kohë që edhe skuadra e Fulhamit të reagonte duke konfirmuar ngjarjen e rëndë.
“Klubi është mirënjohës për reagimin e shpejtë të policisë pas incidentit. Personi i arrestuar nuk do të lejohet të hyjë më në kompleksin e trajnimit dhe nuk do të jetë në gjendje të marrë pjesë në aktivitetet e klubit. Ne do të punojmë me policinë për këtë rast”, thuhet në njoftimin e klubit.
Ndryshe, Kamara ka pasur edhe disa përleshje fizike me kolegët dhe stafin e ekipit. /Telegrafi/