Peter Schmeichel mendon se Thomas Tuchel ka përparësinë për t’u bërë trajneri i ardhshëm i Manchester United nëse shkarkohet Erik ten Hag.
Duke folur për BeIn Sports së fundmi, ai deklaroi: “Më pëlqen. Më pëlqen Thomas Tuchel. Kam pasur kënaqësinë ta intervistoj disa herë. Njohuritë e tij në futboll janë fantastike”.
“Mendoj se ai ka qenë paksa i pafat që ka shkuar në dy klube të mëdha futbolli në kohën e gabuar të historisë së tyre, në periudha kur gjërat nuk funksiononin në çdo nivel”.
“Nuk është se ai nuk bëri mirë me Chelsean për shembull. Dua të them, ai fitoi Ligën e Kampionëve, apo jo? Thjesht më pëlqen ai. Ka diçka rreth tij. Ai projekton një lloj autoriteti. Ju kurrë nuk i krahasoni njerëzit, por ai ka të njëjtën gjë që ka Klopp, e dini”.
“Nëse Manchester United do të ishte në treg për një trajner, ai duhet të përmendet në këtë drejtim. Ai duhet të jetë aty. Ka një përvojë të madhe. Ai ka, siç thashë, autoritetin, ka dëshmuar se mund të fitojë, gjë që mendoj se është shumë e rëndësishme”.
“Tuchel vjen me një sistem dinamik, kështu është luajtur futbolli. Po, sigurisht, është një trajner i klubeve të mëdha, apo jo? Po ashtu edhe Klopp. Klopp do të ishte fantastik edhe për Man United”.
“Nuk po them se ai (Tuchel) duhet të jetë trajneri, thjesht po them se kategoria e trajnerit duhet të ketë Manchester United nëse ata janë në treg për një trajner”, shtoi ai.
Tuchel ka arritur një sasi të mirë suksesi në karrierën e tij menaxheriale, më së shumti duke ndihmuar Chelsean të fitojë titullin e Ligës së Kampionëve 2020/21 kundër të gjitha gjasave.
Megjithatë, periudha e tij e fundit si trajner i Bayern Munichut ka qenë paksa i përzier – pasi bavarezët humbën titullin e Bundesligës për herë të parë në një dekadë – kjo është arsyeja pse klubi do të ndahet me të në verë. /Telegrafi/