Forcat talebane të Afganistanit janë përleshur me rojet kufitare iraniane në kufirin mes dy vendeve.
Sipas BBC, përcjell Telegrafi, talebanët thonë se një ushtar i tyre u vra në luftimet e së dielës, të cilat ndodhën në zonën kufitare midis provincës Nimroz të Afganistanit dhe rajonit Hirmand të Iranit.
Vendet i hodhën fajin njëra-tjetrës për incidentin.
Ka pasur disa përleshje në kufi që kur militantët talebanë pushtuan Afganistanin një vit më parë.
Rrethanat e sakta të përleshjes së fundit mbeten të paqarta.
“Kemi një të vrarë dhe një të plagosur”, tha zëdhënësi i policisë së Nimroz, Bahram Haqmal për agjencinë e lajmeve Reuters.
Në provincën Sistan va Baluchestan të Iranit, zyrtari i Hirmand, Maysam Barazandeh u citua nga agjencia e lajmeve Fars të thoshte se nuk kishte viktima nga pala iraniane.
Agjencia iraniane e lajmeve Tasnim tha se luftimet shpërthyen pasi forcat talebane u përpoqën të ngrinin flamurin e tyre “në një zonë që nuk është territor afgan”, duke çuar në një shkëmbim të të shtënave me armë zjarri që zgjati “disa minuta”.
“Forcat tona dhanë përgjigjen e nevojshme”, tha Barazandeh.
Muajin e kaluar ministria e Jashtme e Iranit raportoi vdekjen e një roje kufitare iraniane pas një tjetër incidenti në të njëjtën zonë. /Telegrafi/