KF Vllaznia e Pozheranit të mërkurën ka zyrtarizuar transferimin e tre lojtareve të rinj.
Elbasan Thaqi është transferuar nga Ferizaj, Alban Regjepi nga Drita dhe Shkumbim Salihu nga Ferizaj. Prezantimi i tyre është bërë te stadiumi i qytetit, “Ibrahim Kurteshi”.
“Shumë shpejt priten të zyrtarizohen edhe dy transferet e reja, Ardian Selimi dhe Labinot Shabani të cilët kanë arritur marrëveshje me klubin, mirëpo nuk kanë mundur të jenë të pranishëm sot gjatë publikimit të transferove”, thuhet në një njoftim të klubit.
Klubi gjithashtu ka arritur marrëveshje edhe me dyshen afrikane, Muhamed Bangura dhe Andre Kamara që pritet të jenë në Pozheran të dielën në mbrëmje.
Njëherësh, pos këtyre transferimeve, ditët në vijim pritet që të publikohen edhe dy emra të rinj.
Kujtojmë që befasia më e këndshme e Ligës së Parë nga edicioni i kaluar, Vllaznia e Pozhoranit, e përfundoi kampionatin në pozitën e tretë në tabelë në Ligën e Parë, ndërsa në barazh triumfoi ndaj Ferizajt dhe u inkuadrua në elitën e futbollit të Kosovës. /Telegrafi/
