Pas kërkesës së kryetarit të Gjilanit, Alban Hyseni, për shpërbërjen e Kuvendit Komunal, PDK-dega në Gjilan ka publikuar dokumentin nga MAPL drejtuar kryetarit sa i përket miratimit të buxhetit për vitin 2025.
Në dokumentin e publikuar nga PDK, thuhet se MAPL kthen në pikën zero procesin e buxhetit për 2025 në Gjilan.
Sipas PDK-së, MAPL ka këshilluar dhe rekomanduar kryetarin Hysenin që të vazhdojë punën si kryetar i Gjilanit, duke ndjekur hapat ligjorë deri në miratimin e buxhetit për vitin 2025.
“Në përgjigjen e MAPL dërguar Alban Hysenit, atij i është këshilluar dhe rekomanduar se si duhet të veproj tutje si kryetar i Gjilanit deri në miratimin e buxhetit komunale 2025. Që i bie se MAPL e ka kthyer në pikën zero procedurën e propozim buxhetit, duke filluar nga dëgjimet publike që duhet të organizohen nga ana e Kuvendit Komunal (KPF) dhe të merren parasysh propozimet për plotësim dhe ndryshim të planifikimit buxhetor”, thuhet në reagimin e PDK-së .
PDK thotë se Ministria e Administrimit dhe Pushtetit Lokal (MAPL) në përgjigjen e saj, ka konstatuar se kryetari i Gjilanit ka shkelur procedurat ligjore dhe nuk i ka respektuar afatet e përcaktuara për miratimin e buxhetit komunal për vitin 2025. /Telegrafi/
