Një pasagjer në një fluturim të Asiana Airlines i cili hapi derën e urgjencës së aeroplanit disa minuta para zbarkimit në Daegu, Kore të Jugut, i tha policisë se e bëri këtë pasi “nuk po ndihej rehat”.
Burri, rreth të tridhjetave, u arrestua pas aterimit të aeroplanit, transmeton Telegrafi.
Ai i tha policisë se hapi derën pasi “dëshironte të zbriste shpejt nga avioni”.
Siç raportohet, ai gjithashtu i tha policisë se ishte i stresuar pasi ishte pushuar së fundmi nga puna.
Burri e kishte hapur derën kur aeroplani ishte 213 metra në lartësi, duke shkaktuar panik në bord.
Nëntë pasagjerë u dërguan në spital pas problemeve me frymëmarrje. Të gjithë u liruan pas rreth dy orësh.
Pamjet e shpërndara në rrjetet sociale tregonin momentet para aterimit, ku dera e aeroplanit ishte e hapur derisa era frynte tek pasagjerët e ulur. /Telegrafi/