Ish-kryeministri izraelit Benjamin Netanyahu me familjen e tij ka braktisur rezidencën në Jerusalem, brenda të cilës jetoi 12 vite.
Zëdhënësi i rezidencës ka thënë se familja e Netanyahu ka konfirmuar se ka dalë nga rezidenca, duke shtuar se një gjë e tillë ka ndodhur pak orë pas mesnatës, transmeton Telegrafi.
Kamionë për rilokim janë parë para rezidencës në fillim të kësaj jave, kurse të premten mediat e atjeshme kanë raportuar se disa mjete motorike janë parë duke u larguar nga rezidenca, dhe se sipas të gjitha gjasave ishin mjetet që i përkisnin eskortës së Netanyahut.
Largimi i Netanyahut nga rezidenca ka pasuar një muaj pasi që u rrëzua nga pushteti, pasi u arrit një marrëveshje me kryeministrin e ri Naftali Benett.
Dikur për rilokim nevojiteshin pak ditë, por rasti i familjes Netanyahu ishte ndryshe – atyre iu deshën disa javë për ta bërë këtë. /Telegrafi/