Shkëndija vazhdon të mbajë primatin në kampionatin e Maqedonisë së Veriut, pas triumfit prej 5-2 kundër Pobedës, me ç’rast ruan diferencën prej tetë pikësh ndaj përcjellësit të parë, Vardarit, kur kanë mbetur edhe 11 xhiro para përfundimit të kampionatit.
Armend Alimi (5′), Ennur Totre (13′), Egzon Bejtulai (26′), Marjan Radeski (83′) dhe Stenho Junior (85′) – ishin protagonistët e skuadrës tetovare në këtë triumf të rëndësishëm.
Një triumf bindës i shoqëruar me lojë të bukur për sy nuk duhet të ketë hapësirë për kritikë, por trajneri Qatip Osmani beson se skuadra ka segmente ku duhet të përmirësohet.
“Sigurisht se jam i kënaqur. Është e vërtetë se në start të gjysmëstinorit pranveror na mungonin golat. Sot (e diel) ishim në nivel dhe shpresoj se edhe në ndeshjet e ardhshme Shkëndija të jetë në nivel të njëjtë dhe të shënojë sa më shumë”.
“Nuk duhej të ndodhë të pranojmë gola, por kur rezultati është bindës ndodh të ketë rënie. Golin e parë e pranuam kur ishim në epërsi 3-0, goli i dytë erdhi kur rezultati ishte 5-1. Kur ke epërsi të lartë vetvetiu krijohet siguri në skuadër ku bie koncentrimi dhe si rezultat pësojmë gol”, ka thënë Osmani, citon faqja zyrtare e klubit. /Telegrafi/
