Sulmuesi i Përfaqësueses së Kosovës, Milot Rashica po kalon nëpër një formë mjaftë të mirë në kampionatin holandez.
Ylli nga Vushtrria ka shënuar gola dhe ka bërë asistime të rëndësishme me fanellën verdh e zi të Vitesses.
Paraqitjet e jashtëzakonshme me skuadrën holandeze i kanë rritur edhe vlerën yllit kosovar.
Deri më tani Rashica kishte një vlerë në ‘Transfermarkt’, prej 3,5 milionë eurove.
Por vlera e vushtrriasit është rritur ndjeshëm pasi çmimi i ri sipas faqes së specializuar për transferime është pesë milionë euro.
Me rritjen e vlerës, Rashica barazohet me bashkështetasin e tij Arbër Zeneli i cili gjithashtu ka vlerën pesë milionë euro.
Në 10 takimet e para në elitën e futbollit holandez, Rashica ka shënuar tre gola dhe ka dhuruar dy asistime.
21-vjeçari ka pasur paraqitje të mira edhe në Ligën e Evropës ku ka bërë dy asistime në tri ndeshjet e para. /Telegrafi/