Site icon Telegrafi

Pamje rrëqethëse nga Rodosi, për shuarjen e zjarrit janë përfshirë edhe ushtria greke dhe forca speciale – evakuime masive

Burim Tmava

Në ishullin grek të Rodosit, i prekur nga zjarret pyjore, rreth 30 mijë banorë dhe turistë janë evakuuar deri më tani nga vendbanimet përgjatë një fronti të gjatë nëntë kilometra, ku zjarrfikësit, ushtria dhe shërbimet lokale kanë luftuar me elementin e zjarrtë prej ditësh.

Rreth 2000 njerëz u evakuuan nga deti nga dy plazhe në Rodos, tha zëdhënësi i shërbimit zjarrfikës, Janis Artopios, duke theksuar se evakuimi u krye “pa incidente”, transmeton Telegrafi.

Katimerini grek bën me dije se në evakuim ndihmuan tre anije të rojës bregdetare, një varkë ushtarake shpëtimi, gomone të forcave speciale dhe rreth 30 anije private.

BBC raporton se më shumë se 3,500 njerëz janë evakuuar të sigurt nga toka dhe deti, dhe 1,200 të tjerë janë në pritje të evakuimit nga tre fshatra – Pefki, Lindos dhe Kalatos.

Shërbimi grek i zjarrfikësve tha për mediat britanike se kërkon falje për “konfuzionin” në ishull, duke paralajmëruar se situata mund të përkeqësohet për shkak të motit.

AFP raporton se më shumë se 200 zjarrfikës dhe pesë helikopterë janë të përfshirë në shuarjen e zjarrit në Rodos, dhe aktualisht po zhvillohet beteja për shuarjen e zjarreve pranë Lermon dhe Lardos.

“Ky nuk është një zjarr që do të shuhet nesër apo pasnesër. Do të duhet të merremi me të për ditë të tëra”, tha zëdhënësi i shërbimit zjarrfikës, Vasilis Vartakojannis.

Ai theksoi se erërat dhe një front zjarri nëntë kilometra i gjatë nga qendra e Rodosit deri në plazhet në lindje të ishullit, krijuan kushte ekstreme.

Sipas zyrtarëve vendas, era është kthyer 180 gradë mëngjesin e sotëm dhe zjarri është bërë më i fortë, duke u përhapur me kilometra drejt zonës turistike. /Telegrafi/

Exit mobile version