‘Pamje apokaliptike’ të rrëshqitjes së dheut në Japoni – dy persona kanë humbur jetën, derisa të paktën 19 të tjerë janë zhdukur

Dy persona humbën jetën dhe të paktën 19 të tjerë janë zhdukur pas një rrëshqitjeje të madhe dheu që ndodhi si pasojë e ditëve me shi, duke ‘fshirë’ shtëpi në Japoninë qendrore të shtunën në mëngjes.

Sipas medieve të huaja, përcjell Telegrafi, pamjet televizive treguan lumin prej balte që u përplas drejt disa ndërtesave dhe duke fundosur të tjera në Atami, një qytet turistik në jug-perëndim të Tokios.

Agjencia për menaxhimin e zjarrit dhe katastrofave, tha se rreth 80 shtëpi janë ‘fundosur’.

“Dëgjova një tingull të tmerrshëm dhe pashë një rrëshqitje balte që rridhte poshtë derisa punëtorët e shpëtimit po i nxisnin njerëzit të evakuoheshin. Kështu që vrapova për t’u ngjitur më lartë”, tha kreu i një tempulli lokal.

“Kur u ktheva, shtëpitë dhe makinat që kishin qenë para tempullit ishin zhdukur”, tha tutje ai. /Telegrafi/