Kryesia e fshatit Prelez i Muhaxherëve në Ferizaj kanë organizuar garën tërheqëse me kuaj të fuqishëm që do të mbahet më 17 shkurt për ta shënuar ditën e Pavarësisë së Kosovës.
Në njoftimin e kryesisë së fshatit ftohen të gjithë qytetarët që të marrin pjesë në një nga ngjarjet më të mëdha dhe spektakolare të Ditës së Pavarësisë.
“Ftoheni në eventin e tretë ndërkombëtar të kuajve, i cili do të mbahet më 17 shkurt 2025, duke filluar nga ora 10:00 në fshatin Prelez i Muhaxherëve, Komuna e Ferizajt. Ky event tashmë është bërë traditë dhe vitin e kaluar ka mbledhur 3500 pjesëmarrës, ndërsa këtë vit pritet të arrijmë mbi 5000 spektatorë nga Kosova, Shqipëria, Maqedonia e Veriut dhe më gjerë”, thuhet në njoftimin e kryesisë së këtij fshati.
Sipas tyre disiplinat kryesore janë: Gara e tërheqjes së peshës – kuaj të fuqishëm në sfidën më të vështirë. Sfilata dhe Gara e Bukurisë së Kuajve – për të kurorëzuar më të mirët nga racat arabe, pasnjolle, dhe të tjera.
“Ky event do të shoqërohet me shfaqje të jashtëzakonshme, çmime prestigjioze, muzikë live, grill, pije freskuese, si dhe një prezantim të veçantë me LED TV dhe zërim profesional. Ne besojmë se kjo ngjarje është një simbol i dashurisë për traditën, kulturën dhe festimin e fitores dhe pavarësisë sonë. Prania dhe mbulimi juaj mediatik do të ndihmojnë në promovimin e kësaj feste të madhe për të gjithë shqiptarët”, thuhet në njoftim./Telegrafi/
Vendndodhja: Prelez i Muhaxherëve, Ferizaj
Linku i eventit:https://www.facebook.com/PreleziMuhaxhereve