Një operacion i rrallë dhe kompleks është kryer me sukses në Spitalin e Përgjithshëm të Gjilanit, ku një ekip mjekësh të specializuar ka arritur të largojë një tumor 9-10 cm nga një pacient mashkull, duke përdorur metodën transanale/transrektale.
Në këtë ndërhyrje të suksesshme morën pjesë një ekip kirurgësh, të udhëhequr nga Dr. Kushtrim Qerimi, kirurg i përgjithshëm i kthyer nga Gjermania me një përvojë mbi 10-vjeçare në sallat kirurgjikale gjermane.
Pjesë e ekipit ishin gjithashtu Dr. Alban Bislimi, kirurg i përgjithshëm në Spitalin e Gjilanit, i cili po ashtu ka ndjekur trajnim në Gjermani, si dhe Dr. Vlora Demolli-Ajeti, kirurge e përgjithshme në të njëjtin institucion.
Operacioni u mbështet nga ekipi i anestezionit i drejtuar nga Dr. Selami Kurteshi, ndërsa në sallën operative kontribuuan edhe Dr. Arber Morina dhe Dr. Sevdail Mustafa. Një rol të rëndësishëm luajtën edhe instrumentaret Sofije dhe Fatjone.
Mjeku kardiolog, Dr. Besim Guda, i cili ishte ftuar me urgjencë për një konsultë paraoperatore, vlerësoi rastin si një ndërhyrje të veçantë, duke theksuar se diagnoza e tillë më parë nuk ishte trajtuar në Spitalin e Gjilanit.
Ai shprehu krenarinë për përkushtimin e mjekëve që, pas përvojës në Gjermani, janë rikthyer për të kontribuar në Kosovë.
“Ky është një tregim për shpresën që ka ky vend, për mjekët e rinj që po marrin përsipër përgjegjësinë e ecjes përpara. Ka shumë të tillë që gjejnë forcën dhe kthehen në vendlindje për të kontribuar,” tha Dr. Guda.
Sipas Gudës ky rast shënon një arritje të rëndësishme për Spitalin e Gjilanit, duke dëshmuar përparimin e tij në kryerjen e ndërhyrjeve të avancuara kirurgjikale. /Telegrafi/