Tifozët e Manchester Unitedit e kanë kritikuar klubin për publikimin e një videoje të Cristiano Ronaldos duke shënuar një gol në stërvitje, ndërkohë që kanë kërkuar fokusim në fitimin e ndeshjeve.
Djajtë e Kuq janë aktualisht në vend të shtatë në Ligën Premier dhe e kanë regjistruar vetëm një fitore në pesë ndeshjet e fundit kampionale duke vazhduar me sezonin e pakënaqshëm.
Superylli portugez ka qenë herë pjesë e ekipit herë jashtë për shkak të lëndimit, ndërsa brenda vitit 2022 e ka gjetur vetëm katër herë rrjetën. Tre nga këta gola i realizoi në fitoren prej 3-2 kundër Tottenham Hotspur në muajin e kaluar.
Vintage @Cristiano 🔀🔥#MUFC | #MUNNOR pic.twitter.com/RWSnpdbQTz
— Manchester United (@ManUtd) April 14, 2022
Sidoqoftë, Unitedi është kritikuar për postimin e videos, ku 37-vjeçari e kalon me stil Hannibal Mejbrin dhe shënon gol të bukur në stërvitje.
Tifozët kanë reaguar shpejt në rrjetet sociale duke ripërsëritur se ekipi i Ralf Rangnick duhet të përqendrohet te ndeshjet dhe jo të shpërndajë video nga stërvitjet.
“Ja po shkojmë sërish me video dhe fotografi nga stërvitjet. Hiqni dorë nga këto gjëra pa lidhje”; “Nuk na nevojitet kjo. Na duhet rezultate”; “Kjo është stërvitje, kërkoni të shënojë gola në ndeshjet e vërteta, do ta shihni. Absolutisht asgjë” – janë disa nga reagimet e tifozëve në Twitter.
Ronaldo është golashënuesi më i mirë i Unitedit këtë sezon me 18 gola në të gjitha garat, megjithatë ai është kritikuar që nga rikthimi duke u konsideruar se nuk është zgjidhja që nevojitet në Old Trafford. /Telegrafi/