Drita ka shpërdoruar mundësinë për ta fituar edhe një trofe, derisa humbi finalen e Superkupës përballë Prishtinës në Antalia të Turqisë 3-1.
Trajneri i kësaj skuadre, Ardian Nuhiu, theksoi pas ndeshjes se kjo humbje do të jetë një leksion i mirë për ekipin e tij dhe se duhet të bëhen gati për kampionat, pasi që do të jetë një garë e zjarrtë.
Tekniku shkupjan e pranoi se kundërshtari i tyre Prishtina ishte më i mirë se ata në këtë sfidë.
“Kundërshtari ishte më i mirë se ne, këtë duhet pranuar. Megjithëse kishim një iniciativë në pjesën e dytë, nuk rrezikuam shumë, kjo edhe falë meritës së kundërshtarit”.
“Është ndeshja e parë në fazën përgatitore dhe u pa edhe lodhja te futbollistët”.
“Por, ne duhet të mësojmë shumë nga kjo humbje, pasi që na pret një kampionat i zjarrtë”, deklaroi Nuhiu.
Gjatë qëndrimit në Turqi, Drita do t’i zhvillojë edhe tri duele të tjera kontrollues ndaj kundërshtarëve nga Rusia dhe Ukraina. /Telegrafi/