Site icon Telegrafi

Një zjarr në afërsi të kryeqytetit të Greqisë errëson qiellin mbi Athinë dhe po shpërndahet me shpejtësi

Burim Tmava

Era e tymit dhe blozës përshkoi Athinën, me qiellin që u errësua ndërsa një zjarr u ndez në verilindje të kryeqytetit grek të dielën.

Më shumë se 250 zjarrfikës, 67 kamionë zjarrfikëse, 12 aeroplanë dhe gjashtë helikopterë po luftojnë zjarrin, i cili shpërtheu rreth orës 15:00 rreth 35 kilometra nga Athina, transmeton Telegrafi.

“Flakët po lëvizin me shpejtësi drejt liqenit Marathon, një rezervuar i rëndësishëm që furnizon Athinën me ujë”, tha koloneli i zjarrfikësve Vassileios Vathrakogiannis, një zëdhënës i departamentit të zjarrfikësve.

Një numër i panjohur i shtëpive janë dëmtuar. Vathrakogiannis tha se erërat arritën forcën e stuhisë në zonën e zjarrit dhe se flakët tejkaluan 25 metra në lartësi. Banorët e fshatrave pranë zonës së zjarrit janë paralajmëruar me mesazhe emergjente që të evakuohen.

“Një tjetër zjarr që shpërtheu në perëndim të Athinës është vënë nën kontroll”, shtoi zëdhënësi, transmeton Telegrafi.

Moti i nxehtë dhe i thatë, i përkeqësuar nga erërat e forta, rrit rrezikun e zjarreve. Qershori dhe korriku ishin më të nxehtat e regjistruara ndonjëherë në Greqi, e cila gjithashtu e regjistroi dimrin më të nxehtë ndonjëherë.

Si meteorologët ashtu edhe zyrtarët qeveritarë kanë paralajmëruar rrezikun e shtuar të zjarreve për shkak të kushteve të motit nga e diela deri të enjten.

Gjysma e vendit do të jetë nën një “alarm të kuq”, tha ministri i Krizave Klimatike dhe Mbrojtjes Civile, Vassilis Kikilias. /Telegrafi/

Exit mobile version