Një ndërtesë apartamentesh 33-katëshe në qytetin e Koresë së Jugut, Ulsan, u përfshi nga flakët të premten herët pasi erërat e forta bënë që një zjarr të ngrihej nëpër kate të tjera.
Si pasojë, siç raportojnë mediat e huaja, përcjell Telegrafi, të paktën 88 persona po trajtohen për lëndime të lehta, sipas Ministrisë së Brendshme dhe Sigurisë së Koresë së Jugut.
Nuk ishte menjëherë e qartë nëse kishte vdekje apo lëndime serioze.
Disa media treguan pamjet e ndërtesës së përfshirë nga flakët dhe pllakat e betonit duke rënë në rrugë.
Qindra banorë u evakuuan nga ndërtesa shumëkatëshe në qytetin port të Koresë së Jugut, thanë autoritetet.
Ndërsa shkaku i zjarrit po hetohet, zjarri mendohet të ketë filluar midis katit të 8-të dhe të 12-të.
Erërat e forta ndihmuan në përhapjen e tij më tej dhe tanimë thuhet se është nën kontroll.
Ndryshe, Bregu juglindor i Koresë së Jugut është goditur nga erëra shumë të forta në gusht dhe shtator, me tajfunin Haishen që ka goditur edhe në Ulsan në fillim të shtatorit. /Telegrafi/