Bëhet e ditur se një djalë 14 vjeçar ka vdekur nga virusi Nipah në Kerala të Indisë.
Ndërkohë, 60 të tjerë tani po cilësohen si “në rrezik të lartë”, pasi mund të kenë rënë në kontakt me virusin.
Siç raportohet, virusi Nipah vjen nga lakuriqët e natës dhe nuk ka shërim e as vaksinë që e parandalon.
Djali ka pësuar arrest kardiak pasi kishte rënë në kontakt me virusin i cili i kishte shkaktuar ethe vdekjeprurëse dhe ënjtje të trurit.
Organizata Botërore e Shëndetësisë (OBSH) e ka klasifikuar virusin si “patogjen prioritar” për shkak të potencialit të tij për t’u shndërruar në epidemi, shkruan skynews, përcjell Telegrafi.
Ministri indian i Shëndetësisë në Kerala, Veena George, njoftoi se qeveria ka lëshuar urdhra për identifikimin dhe izolimin e njerëzve të prekur me Nipah.
“Ka një mundësi minimale për një shpërthim të virusit Nipah në këtë fazë”, tha Dr. Anoop Kumar nga spitali Aster MIMS në Calicut, duke shtuar se situata do të monitorohet në vazhdim.
Ndryshe, në listën e personave që djaloshi ka pasur kontakt me ta janë 214 persona.
Mes tyre, 60 thuhet të jenë në rrezik të lartë, andaj institucionet shëndetësore kanë filluar ngritjen e reparteve për izolimin e pacientëve.
Edhe anëtarët e familjes së të prekurit janë duke u mbajtur për vëzhgim në spital.
Nipah ka shkaktuar vdekjen e dhjetëra njerëzve në Kerala që nga shfaqja e parë e tij në shtetin jugor në vitin 2018.
Ai u identifikua 25 vjet më parë në Malajzi, prej kur ka shpërthyer edhe në Bangladesh, Indi dhe Singapor. /Telegrafi/