Kryeministri i Izraelit Benjamin Netanyahu ka shkarkuar kreun e shërbimit të sigurisë së vendit për dështimin e tij për të parashikuar sulmin e 7 tetorit 2023 nga Hamasi.
Bëhet e ditur se kabineti izraelit u takua të enjten në mbrëmje për të miratuar zyrtarisht shkarkimin e parakohshëm të Ronen Bar, i cili u emërua në tetor 2021 për një mandat pesë-vjeçar si shefi i Shin Bet.
Netanyahu njoftoi qëllimin e tij për të shkarkuar Bar në një deklaratë video të dielën, duke përmendur një “mosbesim të vazhdueshëm” midis tyre.
Masa ngjalli zemërim dhe ndezi më tej demonstratat antiqeveritare në Jerusalem, të cilat panë mijëra izraelitë të bashkojnë forcat me protestuesit që kundërshtonin sulmin e ri të Izraelit në Gaza.
Dhe është hera e parë në historinë e Izraelit që një qeveri shkarkon liderin e Shin Bet, shkruan BBC, përcjell Telegrafi.
Një letër dërguar nga Netanyahu anëtarëve të qeverisë së tij përpara takimit i referohej një “humbjeje të vazhdueshme të besimit profesional dhe personal” midis kryeministrit dhe Bar dhe propozoi përfundimin e mandatit të tij më 20 prill.
“Humbja e besimit profesional është konsoliduar gjatë luftës, përtej dështimit operacional të 7 tetorit 2023 dhe veçanërisht në muajt e fundit”, tha Netanyahu.
Shin Bet është agjencia e brendshme e inteligjencës e Izraelit dhe luan një rol kyç në luftë.
Aktivitetet dhe anëtarësimi i saj janë sekrete shtetërore të mbajtura ngushtë.
Megjithatë, Bar e ka cilësuar vendimin për largimin e tij si të motivuar politikisht.
Times of Israel raportoi se Bar nuk mori pjesë në votimin e kabinetit, por dërgoi një letër duke thënë se shkarkimi i tij ishte “plotësisht i njollosur nga konfliktet e interesit” pasi Shin Bet heton Zyrën e kryeministrit mbi akuzat për “përfshirjen e Katarit në zemër të vendimmarrjes izraelite”.
Ndryshe, Prokurori i Përgjithshëm Gali Baharav-Miara në fund të muajit të kaluar urdhëroi policinë dhe Shin Bet të hetojnë zyrtarët brenda zyrës së Netanyahut mbi lidhjet e supozuara financiare me Katarin.
Partia Likud e Netanyahut mohon të gjitha akuzat. /Telegrafi/