David Beckham thuhet se do të rikthehet tek Manchester United në rolin e ambasadorit në rast se Sheikh Jassim blen aksionet e klubit nga Glazers.
Marrëdhënia e Beckham me Katarin daton në vitin 2013 kur nënshkroi një kontratë afatshkurtër me Paris Saint-Germain. 48-vjeçari ishte gjithashtu i ftuar në Çmimin e Madh të Katarit të Formula 1 të dielën mbrëma dhe kishte një rol ambasadori në Kupën e Botës 2022.
Anglezi i cili sapo ka lansuar serialin e tij në Netflix që flet për jetën dhe karrierën e tij, mbetet i zënë si bashkëpronar i skuadrës Inter Miami që bën gara në Shtetet e Bashkuara të Amerikës.
Sa i përket Manchester United, procesi i blerjes vazhdon pa ndonjë rezultat, pothuajse është bërë një vit që kur familja Glazer njoftoi për herë të parë planin e tyre për të shqyrtuar ‘alternativat strategjike’ për klubin që ata kanë në pronësi që nga viti 2005.
Beckham ishte pjesë e Manchester United që nga viti 1993 deri në vitin 2003, duke nisur fillimisht që nga grupmoshat e reja e deri në debutimin me ekipin e parë.
Gjatë këtyre viteve si lojtar i “Djajve të Kuq”, ai fitoi gjashtë tituj të Ligës Premier, dy herë ishte fitues i “FA Cup” si dhe qershia mbi tortë, Liga e Kampionëve në vitin 1999./Telegrafi/