Nepali po lufton me zjarret më të këqija në pyje në vite, thanë zyrtarët, me tymin që shtrihej nëpër malet e tij.
Si pasojë, shkruajnë mediat e huaja, përcjell Telegrafi, pesë persona kanë vdekur deri më tani duke u përpjekur të shuajnë zjarret që janë ndezur që nga janari, tha të premten Sundar Sharma, një zyrtar i lartë i Autoritetit Kombëtar të Reduktimit dhe Rrezikut të Katastrofave.
Zjarret ishin identifikuar në të paktën 60 vende në 22 nga 77 rrethet administrative të Nepalit, tha ai, duke theksuar nivelet në rritje të ndotjes në të gjithë vendin që ndodhet midis Indisë dhe rajonit të Tibetit të Kinës.
Detajet mbi humbjet nga zjarret janë ende duke u mbledhur, tha Sharma.
Ky ka qenë sezoni më i keq i zjarrit që nga viti 2012, kur qeveria filloi të mbante të dhëna.
“Zjarret në pyje janë arsyeja kryesore për rritjen e ndotjes së ajrit në Kathmandu dhe shumë vende të tjera”, i tha Sharma agjencisë së lajmeve Reuters.
Madje, sipas tij, “zjarret mund të arrijnë kulmin më vonë këtë muaj nëse vazhdon thatësira”.
Nepali urdhëroi që shkollat të mbyllen për katër ditë në fund të marsit pasi ndotja e ajrit u ngjit në nivele të rrezikshme, duke detyruar miliona nxënës të qëndronin në shtëpi.
Ndryshe, zjarret në pyje shpërthejnë shpesh në Nepal gjatë sezonit të thatë janar-maj, kur fshatarët djegin gjethe të thata në pyjet për të nxitur rritjen e barit të freskët për bagëtitë e tyre.
Por Sharma tha se numri i zjarreve këtë vit ishte 15 herë më i madh se zjarret në vitin 2020. Ai nuk kishte menjëherë një arsye për këtë rritje të numrit të tyre. /Telegrafi/