Në një epokë digjitale, Artida Jakupi nga Gjilani, një artiste e talentuar ka zgjedhur t’i përkushtohet edhe artit kaligrafik.
Me një përkushtim të veçantë për bukurinë e shkrimit të dorës, Artida e ka kthyer kaligrafinë në një formë të fuqishme të vetë-shprehjes dhe krijimtarisë.
Artida rrëfen për Telegrafin pasionin e saj, derisa ajo thotë se është rritur me frymën e artit.
“Unë jam rritur me frymën e artit sepse babai im është piktor dhe ai është marrë me kaligrafi prej viteve të 80-ta. Kaligrafinë, për herë të parë e kam parë në fletore të babait dhe më ka pëlqyer shumë”, ka thënë ajo.
Ajo thekson se pasionin ndaj kaligrafisë nuk e ka ushtruar, por edhe bukurshkrimi i saj që nga fëmijëria e ka ndihmuar shumë në këtë drejtim.
“Isha e dalluar në bukurshkrim, derisa edhe mësuesja më ka vlerësuar shumë edhe nëpër klasë të tjera”, ka theksuar ajo.
Për të shkruar kaligrafinë, Artida thotë se duhen mjete të veçanta, të cilat ajo i posedon.
“Për të shkruar në kaligrafi, duhen mjete të veçanta. Kam një kaligraf me maje 1.9 milimetra, të cilin e përdori në shumicën e punimeve të mia. Por, gjithsesi kjo gjithmonë varet prej fontit të punimeve. Ka raste kur duhet të shkruaj me font më të hollë dhe si rrjedhojë duhet ta përdori laps tjetër”, ka thënë Artida.
Artida thotë se në Kosovë nuk ka kurse apo shkolla për të ushtruar këtë profesion, përveç që në shkolla të arteve është lënda tipografia, që në kuadër të kësaj hynë kaligrafia.
Ajo përfundon se aktualisht për shkak të angazhimeve ditore, nuk e ka menduar të hap ndonjë kurs për të rinjtë që dëshirojnë ta ushtrojnë këtë profesion, por që në të ardhmen, do të mbetet ide e hapur për të. /Telegrafi/.