Komuna e Prizrenit, të premten, i është bashkuar nismës për shënimin e Ditës Botërore të Pastrimit me një aksion për pastrimin e hapësirave në brigjet e Liqenit të Vërmicës.
Sipas njoftimit të Komunës së Prizrenit në këtë rast janë grumbulluar dhe larguar mbeturinat, me pjesëmarrjen e akterëve të ndryshëm, raporton Telegrafi.
“Drejtoria e Shërbimeve Publike, organizoi sot aktivitetin “Ta Pastrojmë Kosovën” pas thirrjes së OJQ “Let’s Do It”, që synon ndërmarrjen e disa veprimeve për pastrimin e lokacioneve ku janë krijuar pika ilegale të mbeturinave”, thuhet në njotim.
Aty sqarohet se përcaktimi për Liqenin e Vërmicës ka ardhur si rezultat i mbetjeve të shumta të plastikës.
“Komuna e Prizrenit ka përzgjedhur si lokacion Liqenin e Vërmicës, një zonë ku pas një sezoni shumë të thatë janë grumbulluar shumë mbetje plastike, për shkak të prurjeve nga të gjitha vendbanimet nëpër të cilat kalon Drini i Bardhë”, thuhet në njoftim.
Në të njëjtën kohë është theksuar se me këtë rast janë vendosur edhe katër tabela me mbishkrimin “Ruaje Mjedisin” me qëllim të rritjes së ndërgjegjësimit të shoqërisë për ruajtjen e mjedisit të pastër. /Telegrafi/