Trajneri i Prishtinës, Abdulah Ibrakovic ka folur para përballjes së sotme (e mërkurë) ndaj Llapit në kuadër të gjysmëfinales së Kupës së Kosovës.
Prishtina luan sot në udhëtim te Llapi në ndeshje kthyese gjysmëfinale, pas fitores 2-1 në ndeshjen e parë.
Për këtë takim dhe shumëçka rreth ekipit ka folur trajneri i kryeqytetasve, Abdulah Ibrakovic.
“Për Prishtinën është një sfidë shumë e rëndësishme. Në ndeshjen e së mërkurës ne e kemi avantazhin e rezultatit të ndeshjes së parë. Përparësia jonë për këtë ndeshje është atmosfera tejet pozitive në ekip. Të gjithë janë shumë të motivuar për sfidën e nesërme”, ka thënë fillimisht Abrakovic për faqen zyrtare të klubit.
“Forma jonë është në rritje dhe lojtarët kanë filluar të pranojnë mënyrën e re të lojës, e cila na jep të drejtën të shpresojmë për rezultate të mira”.
“Plisat? Ata e dinë shumë mirë se janë pjesë vendimtare e FC Prishtinës dhe se me dashurinë e tyre dhe ardhjen në stadium na sjellin lumturi të gjithëve.
“Mungesat? Përveç Agim Zekës që ka karton të kuq, pjesa tjetër e ekipit është gati për ndeshjen e nesërme”, përfundoi trajneri i Prishtinës. /Telegrafi/