Kryetari i Komunës së Drenasit, Ramiz Lladrovci, ka shprehur ngushëllimet e tij më të sinqerta familjes Muleta me rastin e ndarjes nga jeta të rreshterit të Policisë së Kosovës dhe ish-ushtarit të Ushtrisë Çlirimtare të Kosovës, Hashim Muleta.
Në telegramin e ngushëllimit thuhet se Hashim Muleta ishte luftëtar i guximshëm, transmeton Telegrafi.
“I ndjeri Hashim Muleta ishte jo vetëm një shembull i shkëlqyer i profesionalizmit në shërbim të Policisë së Kosovës, por edhe një luftëtar i guximshëm i Ushtrisë Çlirimtare të Kosovës, i cili dha kontribut të jashtëzakonshëm në luftën për liri. Me përkushtimin e tij, ai mbrojti vlerat e shenjta të kombit tonë dhe më pas i shërbeu me nder dhe dinjitet shtetit të Kosovës.
Humbja e tij është një dhimbje e madhe për familjen, miqtë, kolegët dhe të gjithë ata që e njohën dhe e çmuan. Në këto momente të vështira, jemi pranë familjes Muleta me mendje dhe zemër. Ju shpreh ngushëllimet e mia më të thella dhe ju uroj që të gjeni forcë për të përballuar këtë humbje të madhe. Qoftë i përjetshëm kujtimi për Hashim Muletën, luftëtarin e lirisë dhe shërbyesin e devotshëm të shtetit”, vijon njoftimi.
Tutje “Komuna e Drenasit shpreh respektin më të lartë për jetën dhe veprën e tij si ushtar i UÇK-së dhe zyrtar policor, duke ruajtur kujtimin e tij me nder dhe krenari”./Telegrafi/