Poezi nga: Agim Mala
Mbi metro fle nata veriu
fjalët janë të rralla
mjegulla e dendur
Nëpër gjithë qytetin
rruga e panjohur të ndjek
Je lodhur me agim malën
tërë ditën e ke dëgjuar të flasë
se është egërsirë
që ha sall veten
se shtëpia e tij në jug
pas nevojtores
ka edhe odë për miq
dhe tjetrën ku flejnë fëmijët
Fjalët e lëna në gjysmë
fjalët e pathëna
Duhet të telefonoja
ta thërras veten e largët
për të satën herë të shpjegoj
se ai ka vdekur në Kosovë
se kot e ka ta vrasë
qyteti i ftohtë i huaj
paralajmërimi i bombave
E tërheq zvarë deri te hoteli
e gjuan
mbi shtratin “fin de siècle”
e lë vetëm
i kthehesh vetes tjetër
nuk ka bërë asgjë sot
vetëm ka menduar për ty
dhe të ka dashur
𝘓𝘶𝘣𝘫𝘢𝘯𝘦̈, 𝘯𝘦̈𝘯𝘵𝘰𝘳 1987
𝐌𝐚𝐥𝐚, 𝐀𝐠𝐢𝐦. 𝐺𝑗𝑎𝑘 𝑛𝑒̈ 𝑒̈𝑛𝑑𝑒̈𝑟𝑟. Prishtinë: Rilindja, 1990.