Kryetari i Komunës së Pejës, Gazmend Muhaxheri, ka njoftuar për përfundimin e rregullimeve në parkun e qytetit, pranë Bistricës.
Përmes një postimi në rrjetin social Facebook, Muhaxheri ndau disa fotografi të zonës së re të rregulluar që ndodhet mbrapa Radio Cafe-së, e cila tashmë është kthyer në një destinacion të ri për qytetarët.
Ai theksoi se kjo hapësirë publike është rrethuar me gjelbërim, pemë dhe një shteg që shtrihet përgjatë lumit, duke krijuar një atmosferë të qetë dhe relaksuese për të gjithë ata që duan të kalojnë kohë në natyrë.
Muhaxheri vlerësoi se ky projekt jo vetëm që përmirëson estetikën e qytetit, por gjithashtu rrit cilësinë e jetës për banorët, duke ofruar një vend të përshtatshëm për relaks, shëtitje dhe aktivitete të tjera rekreative.
“Kjo hapësirë publike ofron një ambient të ri, të këndshëm dhe të qetë, duke përmirësuar estetikën dhe cilësinë e jetës për banorët e Pejës”, ka theksuar Muhaxheri në postimin e tij. /Telegrafi/
