Trajneri i Tottenham Hotspur, Jose Mourinho, beson se skuadra që e drejton mund të sfidojë për titull kudo në Evropë, mirëpo di ta ketë të vështirë që ta fitojë trofeun e Ligës Premier këtë edicion.
Pas fitores ndaj West Bromit (1-0), Spursat pozicionohen në vend të dytë në tabelë me një pikë më pak se lideri Leicester City.
Ekipi i portugezit ka regjistruar vetëm një humbje (ndaj Evertonit në xhiron e parë), ndërsa i ka fituar tri ndeshjet e fundit.
“Mund të them se kjo skuadër mund të bëhet kampion në shumë vende evropiane”, ka thënë Mourinho në konferencën për shtyp pas ndeshjes.
“Liga Premier është më e vështira, sepse në Ligën Premier mund të kesh një sezon të mirë, mund të fitosh shumë pikë, por në fund Liverpooli, Man City, Chelsea, Man Unitedi, Leicesteri, Arsenali. Pra, mund të kesh një sezon të mirë dhe nuk mund të bëhesh kampion”.
“Dhe çfarë mund të bëjmë? Shkojmë ndeshje pas ndeshjeje. Përpiqemi të fitojmë, nuk na interesojnë të tjerët”, është shprehur trajneri. /Telegrafi/