Trajneri portugez, Jose Mourinho kërkon më shumë mbështetje financiare nga bordi i drejtuesve të Manchester United për të larguar interesin nga PSG.
Sipas mediumit Manchester Evening News, agjenti i Mourinhos, Jorge Mendes, ka qenë në kontakt me parisianët pas vlerësimit të shkëlqyeshëm të klubit të mbështetur nga Katari në një intervistë me stacionin televiziv francez, Telefoot, muajin e kaluar.
Është raportuar se Mourinho dëshiron që klubi ‘të rritet’ dhe t’i japë atij më shumë fonde financiare për të forcuar skuadrën e tij, ku në mendje ka disa transferime të mëdha si Neymar dhe Antoine Griezmann.
Djajtë e Kuq kanë rënë tetë pikë prapa liderëve të ligës dhe rivalëve të hidhur lokal, Manchester Cityt, të cilët mbeten të pamposhtur pas njëmbëdhjetë ndeshjeve të Premier Ligës.
Kështu, “Special One” dëshiron fonde shtesë për blerjen e lojtarëve të rinj, pasi në të kundër do të shqyrtoj interesimin nga gjigantët francez.
Në intervistën e tij në Telefoot, Mourinho i cilësoi PSG-në si ekip ‘të veçantë’ dhe kjo deklaratë ka krijuar amulli në ambientin e dashamirëve të futbollit.
“Në një nga ditët djali im që jeton në Londër shkoi në Paris dhe jo në Manchester për të parë ndeshjen”.
“Për momentin në Paris ka diçka të veçantë: magji, cilësi, të rinj, është fantastike”, pati deklaruar trajneri portugez. /Telegrafi/