Roma ka marrë një fitore spektakolare në fundjavë ndaj Lecces me rezultat 2-1.
Ka qenë një fitore me shumë vuajtje e Giallorosëve që deri në minutën e 92-të e panë vetën në disavantazh, por golat nga Sardar Azmoun dhe Romelu Lukaku në minutën e 94-të bën që të merrnin tre pikët.
Sigurisht që meritë të madhe për këtë rikthim kishin edhe tifozët e pranishëm në Olimpico që ishin rreth 70 mijë sosh dhe deri në fund ishin të zjarrtë duke motivuar futbollistët të rikthenin rezultatin.
Paraqitja fantastike e tifozëve në tribuna ka bërë që edhe Jose Mourinho të jap një deklaratë unike, duke i vlerësuar si tifozët më të mirë që ka pasur nga të gjitha skuadrat ku ka qenë trajner.
“Tifozët e Romës e fituan ndeshjen. Futbollistët dhe tifozët ishin të jashtëzakonshëm”, tha fillimisht Mourinho.
“Pak minuta nga fundi kur humbja ishte afër, kur skuadra luan në një mënyrë kaotike, zakonisht nuk është normale të kesh këtë pasion mes tifozëve dhe lojtarëve. Unë kam drejtuar shumë klube, kam qenë në shumë stadiume, por lidhja që ekziston këtu në Romë është unike”, tha Mourinho.
“Kjo është fantastike kur tifozët luajnë me ty deri në fund dhe kjo i bën ata të veçantë”, ka thënë Mourinho.
Sigurisht që deklarata e trajnerit portugez nuk do t’i pëlqej tifozëve të Interit, Chelseat, Portos, Manchester Unitedit, Real Madridit e Tottenhamit ku ka punuar Special One më parë. /Telegrafi/
