Mediat britanike thonë se Jose Mourinho do të menaxhojë një buxhet të madh nëse vjen në stolin e Manchester United.
Më konkretisht, portugezi do të ketë në dispozicion 300 milionë funte për të investuar këtë verë te “Djajtë e Kuq”.
Pra, klubi i njohur anglez po planifikon të “pushtojë” futbollin. Edhe pse nuk mund të flitet me siguri të plotë, njëqind për qind, e ardhmja e Jose Mourinhos duket e lidhur krejtësisht me Manchester United.
Djajtë po luftojnë për “zonën Champions” në Ligën Premier, ndërsa është kualifikuar për në finalen e “FA Cup”, pasi mundi Evertonin në gjysmëfinale.
Sipas Daily Star, Mourinho, që do të shpallet zyrtarisht në fund të këtij sezoni si trajner i “Djajve të Kuq”, do të ketë 300 milionë funte (385 milionë euro) në dispozicion për t’i investuar në blerje, me qëllim që të revolucionarizojë skuadrën dhe të aspirojë të gjithë titujt.
Një investim faraonik, që planifikon të rekrutojë disa nga lojtarët më të kërkuar në botë, duke filluar me Zlatan Ibrahimovic.
Ibra do të jetë vetëm i pari i një liste “bombë” lojtarësh, që sipas Daily Star përbëhet nga Neymar, Cavani, Muller, Pogba dhe Varane.
Kjo listë dëshmon se një nga objektivat e klubit shkon për të mbështetur të rinjtë Martial dhe Rashford, përshtatjen e Memphis dhe problemet fizike të Rooney.
