Site icon Telegrafi

Moti i ligë godet Greqinë, ujërat “marrin me vete” gruan – në ndihmë i del një kalimtar rasti

Burim Tmava

Pasi stuhia Daniel goditi Greqinë, pamjet e përmbytjeve katastrofike të vendit kanë qarkulluar në mediat sociale që nga e hëna.

Në Greqi nisën rrëshqitjet e dheut, u shkatërruan shtyllat elektrike, si dhe dhjetëra vetura u ‘rrëmbyen’ nga ujërat e rrëmbyeshëm, transmeton Telegrafi.

Para kësaj në veri të Greqisë kanë shpërthyer zjarre, ku ka pasur edhe të vdekur. Një nga pamjet e përmbytjeve në Athinë, tregon momentin kur një grua e “merr” me vete uji.

Gruaja po tentonte të mbahej për tabelën e trafikut dhe një kalimtar i rastit i ka ardhur në ndihmë dhe e ka shpëtuar.

Shërbimi Meteorologjik i Greqisë ka bërë të ditur se vendi është prekur nga ngjarjet më ekstreme të motit për sa i përket reshjeve prej se regjistrohen të dhënat në këtë shërbim.

Në Greqi, policia mbylli trafikun në qytetin qendror Volos, rajonin e afërt malor të Pelionit dhe ishullin turistik të Skiathos, pasi shirat shkaktuan të paktën një vdekje dhe veturat u ‘lanë’ nga uji.

Zjarrfikësit thanë se një burrë vdiq pranë Volos kur një mur ra mbi të. Pesë persona rezultojnë të zhdukur, me siguri të përfshirë nga përmbytja.

Autoritetet dërguan alarme nëpër telefonat e qytetarëve në disa zona të tjera të Greqisë qendrore duke paralajmëruar njerëzit të qëndrojnë në shtëpitë e tyre. /Telegrafi/

 

 

Exit mobile version