Intervistoi: Gazmend Kajtazi
Me transformimin e vet të pazakonshëm ka arritur majat e bukurisë. Është zgjedhur “Miss Kosova 2010”, “Miss Liberty of the World 2012", mori pjesë në “Miss Earth 2010”, ka përfaqësuar Shqipërinë në “Miss World 2012”; shijoi aventurën e saj në “VIP Shpija 3”, provoi veten si prezantuese e “Video Festit Muzikor”, është imazh publicitar i DigitAlb….Ka treguar edhe më shumë nga talenti i saj i fshehtë dhe, akoma është një ndër personazhet më të dashura të skenës vendëse.
Ta njohësh privatisht, është kënaqësi e vërtetë, sepse krahas të gjitha sukseseve të cilat i ka arritur, ajo edhe më tej është shumë e shoqërueshme, e hareshme dhe vajzë shumë interesante. Ajo që pëlqehet tek Morena është edhe stili i saj i veshjes, i cili, para së gjithash, është i pazakonshëm, herë-herë edhe avangarde.
Morena, tani e di se çka dëshiron. Mirëpo, është edhe e vetëdijshme për atë që posedon. Me buzëqeshjen e saj karakteristike thyen edhe karakteret më të vrazhda.
Çdo sfide të re i gëzohem, çdo hap që bëj mundohem ta kurorëzoj me sukses. Fundja, çdo gjëje që në jetën time i fala buzëqeshje, e quaj sukses.
Pjesëmarrja në manifestime bukurie është cilësuar si një botë e bukur me shkëlqim, sharmë. Kështu është vërtet?
Në çdo rrugë që hyn, je ti që i jep sharmin apo shkëlqimin e dëshiruar…Spektri ka shumë ngjyra.
Si e niset ju këtë udhëtim? Pra, si u integruat në tregun e bukurisë?
Mendoj se këto gjëra nuk nisen, ato kanë lindur bashkë me mua…është momenti dhe fati që të udhëhiqi me to. E, kjo mua është duke më përcjellë që nga mosha 16 vjeçe.
Thuhet se bukuria është shumë e rëndësishme kur vendos të merresh me art. Ç’ i duhet tjetër një femre për t’u bërë e suksesshme?
Vet arti është i bukur, andaj bukuria e femrës dhe arti sikur shkojnë paralel, por nëse kjo fisnikërohet edhe me mençuri, suksesi nuk mungon.
Njeriu i gëzohet asaj që e do, secili ka diçka të veçantë që e bën të dallojë nga të tjerët.
Çfarë të nevojitet që të dukesh pikërisht kështu siç je?
Buzëqeshja ime.
Çfarë përfitoni ju si mis, atëherë përmes programeve të bukurisë?
Të vetmit përfitim që i gëzohem është shoqëria.
Eksperienca juaj jetësore më e bukur deri tani, cila është?
Ajo që do të vijë. Gjithmonë hapëroj përpara.
Dukesh shumë e bukur dhe bukur e grimuar. Sa shpenzon për dukjen tënde?
Nëse flasim për evenimente, grimi është pjesë përbërëse e tyre, por përditshmëria ime është e thjeshtë dhe pa grim. Të vetmen gjë që shpenzoj është koha, hahaha…
Për veshjet vendos vetë apo këshillohesh me stilistë?
Aty ku ndihem rehat – ky është stili im. Këshilltarin më të mirë që nga fillimi e kisha vetveten, prandaj vazhdoj ta këshilloj vetëm unë Morenën.
A bën ushtrime? Nëse po, çka preferon: aerobi, fitness, jogë, pilates, shkathtësi luftarake apo diçka tjetër?
Jam marrë me karate, ndërsa tani me fitnes.
Nuk mendoj se bukuria e femrës qëndron në lakuriqësi.
A i lehtëson gjërat bukuria për femrat, a e kanë më të lehtë ato të gjejnë dashurinë?
Thonë se fati buzëqesh, jam unë ajo që besoj në fat, e jo në bukuri.
Çfarë kushtesh duhet të plotësojë dikush për të qenë miku juaj?
Duhet të jetë i sinqertë.
Femrat e bukura gjykohen si të përcipta, e ke ndjerë këtë gjë?
Ky është gjykim i rremë. Mençuria nuk peshohet me terezi.
A është e vështirë të ecësh në jetë kur je një vajzë e bukur?
Jo. Rrugët janë përplot me vajza të bukura.
Çfarë të mungon për ta plotësuar jetën tënde?
Nëna.
Çfarë ju jep më shumë kënaqësi në këto momente?
Babai im, ai i cili më bën të buzëqeshi edhe kur kam sytë me lot. /Telegrafi/