Piloti legjendar i Formula 1, Michael Schumacher, pati një aksident të rëndë në ski në vitin 2013 dhe që atëherë publiku nuk ka pasur mundësi ta shohë atë dhe familja nuk ka dhënë asnjë informacion për shëndetin e tij.
Ata e mbajnë çdo gjë top sekret. Laila Hasanovic, e dashura e djalit 25-vjeçar të Michael, Mick Schumacher, së fundi i është bashkuar rrethit të ngushtë të njerëzve që e dinë se ku është Michael dhe si është ai sot, shkruan Daily Mail. Ata thonë se ajo është personi i vetëm jashtë familjes që i është dhënë leja për ta vizituar.
Së fundmi, vajza 27-vjeçare e Michael Schumacher, Gina Maria, u martua me partnerin e saj prej kohësh, Iain Bethke. Një ceremoni solemne private u mbajt në vilën luksoze të familjes Yasmin.
Për të parandaluar çdo shqetësim, të porsamartuarit thuhet se ua ndaluan të gjithëve përdorimin e celularëve, si dhe realizimin e fotove. Nuk dihet nëse Michael ishte në dasmë.
Mes të ftuarve të shumtë ishte edhe xhaxhai Ralf Schumacher, i cili mbërriti në pritje i shoqëruar nga partnerja e tij Etienne Bousquet-Cassagne. Shumë u habitën që Willi Weber, menaxheri i vjetër i Schumacher, nuk ishte në dasmë.
“Shëndeti im është në gjendje të keqe për momentin, kështu që nuk do të kisha shkuar në dasmë edhe nëse do të kisha qenë i ftuar, por nuk isha i ftuar. Dasma e Ginës solli disa kujtime nga miqësia ime me Michael, fitoret dhe sukseset që patëm së bashku, ndoshta më nuk do ta shoh kurrë”, deklaroi Weber për Bild.
“Michael ishte një nga miqtë e mi më të mirë, më shumë si një djalë që nuk e kam pasur kurrë. Askush nuk e di saktësisht se çfarë po ndodh me të sot, kështu që nuk dua të komentoj më tej. Mendërisht i thashë lamtumirë Michael për të gjetur përsëri qetësinë time”, ka shtuar më tej Weber. /Telegrafi/