“Ne duam të fitojmë titullin kampion bote me motorin Honda, por nëse kjo gjë nuk është e mundur, do të vijë një moment kur ne do të vendosim nëse do të bashkëpunojmë sërish me këtë motor apo do të gjejmë një tjetër. Dhe në rast se situata nuk ndryshon dyshimet do të jetë të vogla”, ka thënë drejtori sportiv i makinës McLaren, Zak Brown, që ka mbetur i zhgënjyer nga paraqitja e makinës britanike në Botërorin e Formula 1.
Deklarata e tij i ngjan një ultimatum drejtuar motorit Honda të cilin përdor makina McLaren, që prej vitesh nuk arrin të rivalizojë për titull në garat e Formula 1.
“Na njoftuan se nuk do të kemi përmirësimet e premtuara për garën e Kanadasë. Kjo na ka zhgënjyer shumë dhe po kaq të mërzitur janë edhe pilotët”, shtoi ai.
Gjatë këtij Botërori, makina McLaren-Honda nuk ka grumbulluar ende asnjë pikë, duke qenë në vendin e fundit dhe vështirë se situata mund të ndryshojë në garën që zhvillohet këtë fundjavë, në Kanada. /telesport/