Lojtari i javës: Javier Zanetti
Klubi: Inter
Vendi: Argjentina
Mosha: 38 vjeç
Roli: Mbrojtës
E arritura: Inspiroi Interin drejt fitures ndaj Milanit në Derbi della Madonnina.
Diego Milito shënoi golin shumë të rëndësishëm për Interin në fitoren e madhe ndaj Milanit të dielën mbrëma, por njeriu i cili edhe njëherë shokoi të gjithë ishte sigurisht Javier Zanetti.
Në moshën 38 vjeçare, legjenda argjentinase duket të jetë në formën më të mirë në karrierën e tij, por kjo gjithmonë ka qenë e pranishme te ‘Il Capitano’ në fanellën zikaltër. Si lider i vërtetë i Interit, Zanetti edhe njëherë ishte plot stil në fitoren minimale të Interit në San Siro.
Ish-mbrojtësi i Banfield, i cili po ashtu luan edhe në mesfushë, ishte zemra e aksionit të golit të Diego Militos, pasi ishte krosimi i tij nga e djathta ai që e gjeti El Principen për golin e fitores.
Si një legjendë e vërtetë, si lojtar klasi botëror, Zanetti ishte rrezik permanent për Milanin dhe mbrojti mirë territorin e tij, kurse kishte energji, entuziazëm dhe dinamizëm e vizion të cilin lojtarët e rinj e kanë zili. /Telegrafi/