Fituesit e javës në Ligën e Kampionëve
Wayne Rooney
Duket se nuk ka asgjë që e ndalon sulmuesin anglez. Ai shënoi golin e tij të 29-të dhe të 30-të të sezonit për të ndihmuar Manchester United të shkatërrojë Milanin me fitore 4-0 dhe për ta eliminuar nga Liga e Kampionëve me rezultat të përgjithshëm 7-2. Rooney shënoi dy gola edhe në ndeshjen e parë, për të çuar kështu në katër numrin e shënimeve kundër rosonerëve.
Wayne Rooney duke iu gëzuar njërit nga golat (Foto: AFP)
Ji-Sung Park
Mesfushori i palodhshëm duket se është duke u ruajtur vetëm për ndeshje të mëdha nga trajneri i Manchester United, Sir Alex Ferguson. Jug-koreani nuk zhgënjeu as kësaj here, duke shënuar njërin nga golat e fitores 4-0 ndaj Milanit dhe duke bllokuar mesfushorin kundërshtar Andrea Pirlo.
Ji-Sung Park pas shënimit të golit (Foto: AP)
Arjen Robben
Anësori i qetë shpërtheu duke shënuar golin e dytë për Bayern Munichun në humbjen 3-2 ndaj Fiorentinës në Ligën e Kampionëve. Edhe pse u mposhtën dhe rezultati i përgjithshëm ishte i barabartë, 4-4, bavarezët arritën të kualifikohen më tej në garën evropiane falë më shumë golave të shënuar si mysafir, ku vendimtar ishte pikërisht goli i Robben.
.jpg)
Arjen Robben feston kualifikimin me bashkëlojtarët (Foto: AP)
Nicklas Bendtner
Sulmuesi danez heshti kritikët në ndeshjen kundër Portos. Pas paraqitjes zhgënjyese në vikend kundër Burnleyt, danezi u rikthye në fushë për të shënuar hat-trick në fitoren 5-0 ndaj Portos në Ligën e Kampionëve dhe për të kualifikuar më tej topçinjtë.
.jpg)
Nicklas Bendtner duke shënuar golin e tretë nga penaltia (Foto: AP)
Stevan Jovetic
Mesfushori i Fiorentinës ndoshta nuk arriti ta dërgojë në çerekfinale ekipin e tij, por joshi edhe një herë vëmendjen e gjigantëve të futbollit. Ai shënoi dy gola në fitoren 3-2 ndaj Bayern Munich, që megjithatë nuk mjaftuan për të dërguar Violan në fazën e ardhshme të Ligës së Kampionëve.
Stevan Jovetic i zhgënjyer pas eliminimit nga Bayern (Foto: AFP)
Humbësit e javës në Ligën e Kampionëve
Cristiano Ronaldo
Për Cristiano Ronaldon, ashtu siç nuk ishte e këndshme disfata e parë në Lyon, madje edhe më i pakëndshëm ishte barazimi në Bernabeu. Portugezi ambicioz edhe pse shënoi një gol për Real Madridin, ekipi i tij nuk arriti të kualifikohet për në çerekfinale të Ligës së Kampionëve. Edhe më i dhimbshëm për të është fakti se finalja mbahet pikërisht në Bernabeu ndërsa rast për të arritur atje do të kenë ish-bashkëlojtarët e tij, pasi United eliminoi Milanin.
Cristiano Ronaldo as që e ka menduar se mund të eliminohet nga Lyon (Foto: AP)
Real Madrid
Klubi spanjoll harxhoi plot 200 milionë funte gjatë verës me qëllimin primar për të arritur në finalen e Ligës së Kampionëve, që këtë vit mbahet në stadiumin e këtij klubi, Santiago Bernabeu. Por Real Madridi nuk arriti të thyejë barrikadën e pesë viteve të fundit, dhe për të gjashtën herë nuk arriti të kualifikohet në çerekfinale të garës evropiane.
Lojtarët e Real Madrid të zhgënjyer në fushë (Foto: AP)
Leonardo
Në vend se të nxjerrë një sulmues në fushë, Leonardo rrezikoi me tre të tillë. Kjo iu shpagua për keq menaxherit të Milanit, pasi ekipi i tij u shkatërrua me rezultat 4-0 nga Manchester United.
Leonardo duke dhënë këshilla për lojtarët e tij (Foto: Reuters)
David Beckham
Edhe pse pritej të ishte një rikthim emocionues për Beckham në Old Trafford, mesfushori anglez nuk priti që ky të jetë edhe kaq zhgënjyes. Ai u kyç në lojë kur ekipi i tij pësonte me rezultat 3-0 dhe shijoi edhe një gol tjetër në portën e tij gjatë minutave sa qëndroi në fushë.
David Beckham përshëndet fansat në Old Trafford (Foto: AP)
Jorge Fucile
Mbrojtësi i Portos ka qenë një prej lojtarëve më të dobët në këtë rund të Ligës së Kampionëve. Fucile ishte një prej fajtove që ekipi i tij pësoi me rezultat të thellë, 5-0, ndaj Arsenalit në Emirates.
Jorge Fucile duke ndërhyrë ndaj Samir Nasri (Foto: AFP)
/Telegrafi/