Më 7 shkurt të këtij viti u promovua libri me poezi “Amë” i autores nga Mitrovica, Nora Prekazi, në natën e dytë të festivalit poetik të Prishtinës. Ndërsa më 20 qershor promovimi i këtij libri u bë edhe në Mitrovicë mes miqsh dhe dashamirës të poezisë.
Libri me poezi “Amë” është shkruar përgjatë viteve, si një ditar personal i jetës dhe veprës së autores.
Libri ndahet në tre kapituj: e hirtë, e kaltër dhe e bardhë. Kapituj këta që përmbledhin tri etapa të jetës së autores: fazën e hershme të rinisë, fillet e para të pjekurisë dhe periudhën e saj si një grua dhe nënë e re.
Autorja e librit, Nora Prekazi, në një intervistë për Telegrafin, ka thënë se kishte filluar të shkruaj poezi qysh në periudhën e adoleshencës në Mitrovicë, siç e cilëson ajo “në qytetin e dërrmuar nga lufta”.
Sipas saj, përmes vargjeve ka kërkuar që të rrëfehet dhe të ngushëllohet.
Në kapitullin e parë, ajo thur vargje në kërkim të vetes, pranimit dhe dorëzimit, duke specifikuar të hirtën që e rrethon në mjedisin e saj. Në kapitullin e dytë fillon procesi i pjekurisë, njohjes së vetes dhe rrethit të saj.
Ndërsa kapitulli i fundit dokumenton amësinë, rolin gjinor të autores dhe se çfarë do të thotë të jesh nënë dhe grua.
“Ky kapitull i dokumenton preokupimet shoqërore, individuale të një gruaje në një kohë dhe në një hapësirë, si dhe reagimin e saj përballë tyre”, ka thënë Prekazi, për Telegrafin.
Libri me poezi “Amë” është botuar nga shtëpia botuese “Littera”. Libri ishte pjesë e botimeve të kësaj shtëpie botuese në kuadër të Panairit të 24-të të Prishtinës dhe mund të gjendet në libraritë “Dukagjini” dhe “Artini” në Prishtinë.
Redaktore e librit është Donika Dabishevci, kurse recensente Vlora Konushevci. Ndërsa në panele të promovimeve të librit pjesë ishin Arbër Selmani dhe poeti e kritiku letrar, Bujar Meholli.
Autorja e librit “Amë”, Nora Prekazi, ka shkruar shumë poezi që nga mosha e saj e hershme e të cilat janë botuar në disa antologji dhe revista letrare si: MM, botimet e Polip Festival, Exlibris, ObserverKult, Magma e të tjerë. Këto poezi janë përkthyer në gjuhën angleze, serbe dhe greke.
Tashmë, Nora Prekazi është drejtore në Muzeun e Qytetit të Mitrovicës, ku përveç punës së saj profesionale ajo njihet edhe si aktiviste sociale e artiste. /Telegrafi/