Mbrojtësi i njohur mitrovicas Leotrim Bekteshi, do ta vazhdojë karrierën në Norvegji te klubi Mjondalen IF, që garon në nivelin e dytë të garave.
Bekteshi ka lindur në Gjermani në vitin 1992 nga prindër kosovarë, ndërsa së fundmi ka qenë pjesë e kampionit aktual FC Prishtina.
Ai u largua nga klubi për tu bashkuar me familjen e tij që jetojnë në Norvegji.
Drejtori sportiv i klubit, Jan-Remi Dalen, ka lavdëruar Bekteshin për aftësitë dhe karrierën e tij.
“Ai është një mbrojtës i mirë që ka një rutinë ndërkombëtare, ka qenë në ekipin e viti në vendin e tij për tre vjet rresht. Me Leo kemi një lojtar të sigurt dhe solid që e bën punën e tij”, ka thënë ai.
Edhe trajneri Vegard Hansen, e ka lavdëruar ardhjen e mbrojtësit tonë, duke thënë se mund t’i ndihmojë lojtarët e rinj.
“Është një nënshkrim i favorshëm për ne, si financiarisht ashtu edhe sportiv. Leo vjen me rutinë të shkëlqyer dhe ka përvojë ndërkombëtare që mund ta ndajë me lojtarët tanë më të rinj”, deklaroi ai. /Telegrafi/