Kalimi i Amir Rrahmanit te Napoli nga Verona ëhstë pritur me bujë nga mediat italiane.
Mbrojtësi i Përfaqësueses së Kosovës, Rrahmani, tashmë është kthyer në temë nga gazeta e njohur italiane, La Gazzetta dello Sport, që të martën ka publikuar një shkrim analizë për lojtarin.
“Me xhokerin Rrahmani, mbrojtja e Napolit nuk do të ketë hapësira”, ka shkruar La Gazzetta dello Sport për lojtarin tonë që vazhdon të mbetet në huazim te Verona.
La Gazzetta dello Sport shkruan se Rrahmani te Verona luan si njëri prej tre mbrojtësve, por gjatë karrierës ka luajtur edhe në mbrojtje me katër lojtarë, madje edhe në krah, kur ishte te Dinamo Zagreb. Për këtë Rrahmani mund të përdoret nga Napoli për pozita të ndryshme.
“Ai do të jetë i gjithanshëm para portës së Napolit. Do të jetë lojtari për njëmijë përdorime dhe për çdo emergjencë. Rrahmani ka luajtur në çdo pozitë në mbrojtje, pos si portier jo. Mund të zëvendësojë shumë lojtarë të Napolit”, ka shkruar gazeta italiane, duke përmendur emra si Elseid Hysaj, Fazhi Ghoulam dhe Kalidou Koulibaly.
Rrahmani nga sezoni i ardhshëm do të duhet të luftojë për një pozitë te Napoli. /Telegrafi/