Çdo rajon konkurrues ka përfunduar garat në Ndarjen Verore 2022, skuadrat janë përzgjedhur dhe tani komuniteti po pret me padurim fillimin e Kampionatit Botëror 2022 të League of Legends, i cili pritet të fillojë në fund të shtatorit.
Kampionati Botëror do të përfshijë 24 ekipe nga e gjithë bota ku do të garojnë në të gjithë Amerikën e Veriut nga e enjtja, 29 shtator deri të shtunën, 5 nëntor.
Faza ‘Play-In’ do të zhvillohet nga 29 shtatori deri më 4 tetor, ku do të marrin pjesë 12 ekipe nga e gjithë bota.
Ekipet pjesëmarrëse në Play-In janë: DRX, Royal Never Give Up, Fnatic, MAD Lions, Evil Geniuses, Beyond Gaming, DetonatioN FocusMe, Saigon Buffalo, LOUD, Chiefs Esports Club, Istanbul WildCats dhe Isurus.
Këto 12 skuadra do të ndahen në dy grupe me nga gjashtë, ku do të luajnë një ndeshje kundër çdo ekipe tjetër të grupit të tyre, ku katër skuadrat më të mira do t’u bashkohen 12 skuadrave të tjera të cilat janë kualifikuar automatikisht për në fazën e grupeve.
Ekipet e ftuara direkt në fazën e grupeve: Cloud9, 100 Thieves, G2 Esports, Rogue, T1, Gen.G, DWG KIA, Edward Gaming, JD Gaming, Top Esports, GAM Esports dhe CTBC Flying Oyster.
Më pas skuadrat do të ndahen në katër grupe, çdo skuadër do të luajë kundër çdo skuadre në grupin e tyre dy herë, dy skuadrat e para nga të katër grupet do të kalojnë në fazën eliminatore të turneut, ku gara do të jetë më e ashpër se kurrë më parë.
Tetë skuadrat më të mira të fazës së grupeve do të kualifikohen për në fazën e eliminimit, e cila përfshin çerekfinalet, gjysmëfinalet dhe finalet e mëdha.
Në këtë fazë ndeshjet do të mësohen përmes një shorti që zhvillohet pas ditës së fundit të fazës së grupeve, më pas turneu kalon në një grup me një eliminim me të gjitha ndeshjet që zhvillohen në formatin ‘Bo5’.
Ndërsa në fund skuadra më e mirë do të kurorëzohet kampione e botës në Kampionatin Botëror 2022 të League of Legends me datën 5 nëntor. /Telegrafi/