Bad News Eagles ka siguruar pjesëmarrjen në fazën ‘Legends Stage’ të turneut më të madh të CS:GO, IEM Rio Major, i cili po mbahet në qytetin Rio de Janeiro të Brazilit.
Si pjesëmarrës në fazën ‘Legends Stage’, ekipi shqiptar tashmë ka siguruar çmimin prej 20.000 dollarësh, si dhe është në garë për të fituar çmimin e vendit të parë 500.000 dollarë.
Kjo nuk është e tëra sa i përket fitimeve për ekipin Bad News Eagles, pasi ata do të fitojnë një shumë të majme edhe nga stikerat virtual në lojën e CS:GO, e cila vitin e kaluar i përfol se mund të arrijë vlerën e një milion dollarëve.
Turneu IEM Rio Major, shpërndan çmime në vlerë 1.2 milion dollarë për të gjitha ekipet pjesëmarrëse, si dhe vendi i parë do të sigurojë pjesëmarrjen në turneun IEM Katowice 2023 si dhe në turneun Blast Premier 2022.
Ndeshja e radhës për ekipin shqiptar do të zhvillohet me datën 5 nëntor, dhe kundërshtari i tyre do të mësohet së shpejti. /Telegrafi/