Ballkani do të takohet me Ludogoretsin të mërkurën mbrëma në ndeshjen e dytë kualifikuese për në fazën e grupeve të Ligës së Kampionëve.
Takimi i parë i luajtur në “Fadil Vokrri” javën e kaluar i solli kampionit të Kosovës epërsinë prej dy golave, ndërsa do të synojnë të kalojnë në rrethin e dytë.
Kapiteni i skuadrës nga Suhareka, Edvin Kuç ka thënë se ata presin respekt maksimal nga lojtarët kundërshtarë.
“Ne nuk e kemi ndërmend të ndërrojmë diçka nga ndeshja e parë”, ka thënë ai fillimisht në konferencë për media.
“Përballë kemi një skuadër shumë të fortë, të cilën e kemi respektuar, por tani edhe ne duhet të respektohemi”.
“Nuk kemi ardhur ta vendosim autobusin para portës, por të tregojmë kualitetin dhe ta mbrojmë rezultatin e ndeshjes së parë”.
“Kemi edhe 90 minuta dhe shpresojmë të kalojmë në raundin e dytë”, ka shtuar më tej Kuç. /Telegrafi/