Kryetari i Komunës së Prizrenit, Shaqir Totaj i ka bërë thirrje të rinjve me ide për biznes që të aplikojnë në Startup Bootcamp, ngjarje që organizohet nga Makerspace Innovation Center Prizren.
“Ke një ide biznesi, por nuk di si ta kthesh atë në realitet? Startup Bootcamp është vendi ku mund të mësosh mbi ndërmarrësinë, t’i zhvillosh aftësitë e tua dhe ta ndërtosh idenë tënde hap pas hapi”, ka shkruar Totaj në rrjetet sociale, raporton Telegrafi.
Ai ka bërë të ditur se aktiviteti mbahet me datat 21, 22 dhe 23 shkurt 2025 në ITP Prizren dhe se ka “për qëllim t’u ndihmojë të gjithë atyre që dëshirojnë t’i transformojnë idetë e tyre në koncepte të strukturuara dhe të qëndrueshme”.
“Gjatë këtij aktiviteti, fokus të veçantë do të kenë punëtoritë, të cilat synojnë avancimin e ideve të pjesëmarrësve. Startup Bootcamp përfshin trajnime dhe punëtori të udhëhequra nga mentorë dhe ekspertë të industrisë, duke siguruar një përvojë gjithëpërfshirëse dhe interaktive. Çdo pjesëmarrës/e do të marrë vlerësime të personalizuara dhe udhëzime për zhvillimin e mëtejshëm të idesë së tij/saj”, është shprehur Totaj, duke shtuar se afati për aplikime është i hapur deri me 16 shkurt 2025.
Startup Bootcamp, është një aktivitet edukativ tre-ditor, i krijuar për individët dhe ekipet që kanë ide të biznesit dhe dëshirojnë të mësojnë si t’i zhvillojnë ato më tej, që zbatohet nga Makerspace Innovation Center Prizren dhe mbështetet nga Komuna e Prizrenit, GIZ Kosovo dhe ITP Prizren. /Telegrafi/