Kryetari i Komunës së Pejës, Gazmend Muhaxheri, ka marrë vendim për ndalimin e përdorimit të doracakëve “Edukimi Seksual dhe Shëndeti Riprodhues i Shëndoshë dhe i Sigurt” në të gjitha shkollat e kësaj komune.
Përmes një postimi në Facebook, Muhaxheri ka theksuar se ky vendim është marrë me qëllim të garantimit të mirëqenies dhe zhvillimit të shëndetshëm të fëmijëve.
“Me qëllim të garantimit të mirëqenies dhe zhvillimit të shëndetshëm të fëmijëve tanë, kam marrë VENDIM për ndalimin e përdorimit të Doracakëve ‘Edukimi Seksual dhe Shëndeti Riprodhues i Shëndoshë dhe i Sigurt’, të miratuar nga MASHT-i, në të gjitha nivelet arsimore në Komunën e Pejës”, ka shkruar kryetari Muhaxheri.
Sipas Muhaxherit procesi mësimor do të bazohet vetëm në tekstet zyrtare, deri në rishikimin e këtyre materialeve nga Ministria e Arsimit, Shkencës dhe Teknologjisë (MASHT), duke respektuar shqetësimet e prindërve dhe duke mbrojtur vlerat edukative të fëmijëve.
Ky doracak është kundërshtuar edhe nga shumë komuna të tjera të Kosovës, mes tyre edhe Prishtina, e cila ka refuzuar implementimin e tij në shkollat e kryeqytetit. /Telegrafi/
