Roma ka fituar derbin e zjarrtë lokal ndaj Lazios me rezultat të ngushtë 2-1.
Është skuadra e Eusebio Di Francescos, Roma, e cila iu gëzua në fund fitores në derbin e zjarrtë të kryeqytetit italian, derbi ky që u bë edhe më i mirë nga tifozëritë e të dy skuadrave që krijuan atmosferë fantastike.
Pjesa e parë e takimit ishte e barabartë me të dyja skuadrat që patën rastet e veta për gol, por asnjëra nuk arriti të tund rrjetën.
Rastet më të mira ishin ato të Ciro Immobiles (2’), i cili shënoi gol, por u anulua për pozitë jashtë lojë dhe ai i Edin Dzekos (20’) që nuk gjeti cakun.
Pjesa e dytë e takimit nisi furishëm për vendasit e Romës, të cilët shënuan dy gola të shpejt në fillim të kësaj pjesë loje.
Fillimisht ishte Diego Perotti, i cili shënoi në minutën e 49-të nga pika e bardhë për 1-0, ndërsa në minutën e 53-të ishte Radja Nainggolan që shënoi supergol nga distanca për 2-0.
Lazio arriti të kthehet në lojë në minutën e 72-të me anë të Immobiles, i cili ngushtoi epërsinë nga pika e bardhë për 1-2.
Megjithatë, ky gol nuk iu ndihmoi aspak lacialëve pasi pas 90 minutave derbi i zjarrtë i kryeqytetit romak i takoi Giallorossëve.
Pas kësaj fitore, Roma ngjitet në pozitën e tretë me 30 pikë, por me një ndeshje më pak, ndërsa Lazio renditet në pozitën e pestë me 28 pikë.
Në takimin e radhës, Giallorossët udhëtojnë te Genoa, ndërsa Lazio e pret në shtëpi Fiorentinën. /Telegrafi/