Presidenti i Koresë së Jugut e ka shpallur një periudhë kombëtare zie për shkak të ikjes në turmë gjatë festimeve të Halloween-it në Seul ku tanimë numri i të vdekurve ka shkuar në 151.
Presidenti Yoon Suk-yeol, shprehu ngushëllimet për viktimat derisa i uroi shërim të shpejtë të lënduarve në një deklaratë të dielën, përpara se të vizitonte vendin e ngjarjes, transmeton Telegrafi.
“Kjo është vërtetë tragjike”, tha ai. “Një tragjedi dhe fatkeqësi që nuk duhej të kishte ndodhur në zemër të Seulit mbrëmë”.
Mediet koreano-jugore raportuan se gjithsej 151 persona u vranë në përplasjen e turmës në një zonë të mbushur me jetë nate në Seul të shtunën mbrëma, derisa të paktën 82 persona u lënduan.
Choi Seong-beom, shefi i departamentit të zjarrit Yongsan të Seulit, tha se numri i vdekjeve mund të rritet dhe se një numër i paspecifikuar i të lënduarve janë në gjendje kritike – me të paktën 50 persona që po trajtohen për arrest kardiak. /Telegrafi/