Komuna e Zveçanit ka marrë pjesë në panairin ITB Berlin 2025, i cili është një panair në promovim të turizmit në Kosovë.
Kështu ka njoftuar kryetari i kësaj komune, Ilir Peci, shkruan Telegrafi.
“Me kënaqësi të madhe ju informoj se si Kryetar i Komunës, së bashku me stafin tim, kemi marrë pjesë në Panairin ITB në Berlin, një nga ngjarjet më të mëdha të industrisë së turizmit në botë”, ka thënë kryetari.
Ai ka thënë se ky panair është një mundësi e mirë për të promovuar Kosovën si destinacion turistik dhe për të krijuar mundësi bashkëpunimi me operatorët turistikë ndërkombëtarë.
“Njëkohësisht, jemi ndjerë të nderuar që morëm pjesë në një takim me Ambasadorin e Kosovës në Gjermani, Z. Faruk Ajeti, i cili na mirëpriti dhe na shprehu mbështetje të fortë iniciativave tona për zhvillimin e turizmit dhe përmirësimin e imazhit të Kosovës në arenën ndërkombëtare”, ka përfunduar kryetari i Komunës së Zveçanit, Ilir Peci. /Telegrafi/
