Komuna e Kamenicës ka hapur thirrjen për programin “Fuqizimi i Grave nga komunitetet e margjinalizuara me aftësi sipërmarrjeje dhe profesionale”.
Sipas këtij njoftimi gjatë një periudhe 6 muajshe (Dhjetor-Maj), pjesëmarrësit do të kalojnë në një program trajnimi të përshtatur për nevojat dhe kapacitetet e tyre individuale.
“Trajnimet në të cilat mund të trajnohen të gjitha gratë pjesëmarrëse janë: rrobaqepsi, floktari dhe artizanat (për rrobaqepsi dhe floktari trajnimet mbahen në Prishtinë, ndërsa për artizanat mundësia është që trajnimet të mbahen në Kamenicë, por që grupi duhet të jetë i përbërë prej 10 personave/gra)”, thuhet në njoftim.
Ndër të tjera pas përfundimit të programit të trajnimit fillestar, gratë pjesëmarrëse do të kalojnë një javë të shtesë trajnimi intensiv në pesë lëndë kryesore të menaxhimit të biznesit.
Ky trajnim në bashkëpunim me Fondacionin ‘Jahjaga’, do të shoqërohet me udhëzime praktike dhe mbështetje për të zhvilluar më tej aftësitë e tyre ndërmarrëse.
Pas kësaj faze, ky projekt do të mundësojë shërbime ndërmjetësimi pune duke bashkëpunuar me disa kompani që operojnë në sektorët përkatës. Këto kompani, të cilat janë në përputhje me fokusin e programit të trajnimit, do të kenë mundësinë të punësojnë gratë që e përfundojnë me sukses programin. /Telegrafi/