Drejtuesit e Komunës së Prizrenit dhe të KRM “Ekoregjioni”, të enjten, kanë nënshkruar dy kontrata. E para ka të bëjë me menaxhimin e mbeturinave. Ndërsa e dyta me menaxhimin e objektit të tualeteve publike.
“Kryetari Shaqir Totaj nënshkroi sot dy kontrata me KRM “Ekoregjioni” SH.A., atë për menaxhimin, grumbullimin, transportin dhe deponimin e mbeturinave në Komunën e Prizrenit, si dhe kontratën për menaxhimin e objektit të tualeteve publike në Komunën e Prizrenit”, thuhet në njoftimin e Komunës së Prizrenit, raporton Telegrafi.
Në emër të KRM “Ekoregjioni” marrëveshjet janë nënshkruar në kryeshefi ekzekutiv, Burim Shala.
“Me këto marrëveshje qytetarëve u mundësohet mjedis i pastër dhe kushte më të mira higjienike”, thuhet në njoftimin e Komunës.
Kontrata për menaxhimin, grumbullimin, transportin dhe deponimin e mbeturinave është vazhdimësi e bashkëpunimit të kahershëm mes Komunës dhe “Ekoregjionit”.
Ndërkaq kontrata për menaxhimin e objektit të tualeteve publike në Komunën e Prizrenit është nismë e re, pasi që ndërtimi i tij ka nisur vitin e shkuar, në hapësirën përballë administratës komunale, si rrjedhojë e aktiviteteve për implementimin e Agjendës së Kontratës Sociale për Komunën e Prizrenit, që mbështetet nga USAID, raporton Telegrafi.
Kontrata Sociale ka për qëllim ka ndërtimin e praktikave të qëndrueshme të pjesëmarrjes publike dhe forcimin e partneritetit ndërmjet qeverisjes lokale dhe grupeve të qytetarëve, në funksion të përmirësimit të kualitetit të jetës së banorëve të Komunës së Prizrenit.
Ndërtimi i tualeteve publike dhe rifunksionalizimi i Qendrës Rinore në lagjen “Ortakoll” kanë qenë projekte që janë përzgjedhur për realizim nga grupet e qytetarëve, ndërkohë që janë financuar nga USAID dhe Komuna e Prizrenit. /Telegrafi/